ലണ്ടനില്‍ ആധുനിക കുരിശിന്റെ വഴി, രണ്ടാം സ്ഥലം ഗാന്ധിപ്രതിമ

ലണ്ടനില്‍ ആധുനിക കുരിശിന്റെ വഴി, രണ്ടാം സ്ഥലം ഗാന്ധിപ്രതിമ

ലണ്ടന്‍: കുരിശിന്റെ വഴിയും ഗാന്ധിയും തമ്മിലെന്തു ബന്ധം എന്നു ചിന്തിക്കുന്നുണ്ടാകും. എന്നാല്‍ ആധുനിക രീതിയിലുള്ള കുരിശിന്റെ വഴിയാണ് ലണ്ടനില്‍ ഈ നോമ്പുകാലത്തു നടക്കുന്നത്. ലണ്ടനിലെ പാര്‍ലമെന്റ് ചത്വരത്തില്‍ സ്ഥാപിച്ചിരിക്കുന്ന ഗാന്ധിപ്രതിമയുടെ മുന്നിലായിരിക്കും കുരിശിന്റെ വഴിയുടെ രണ്ടാം സ്ഥലം. കേംബ്രിഡ്ജ് യൂണിവേഴ്‌സിറ്റിയും ലണ്ടനിലെ കിങ്‌സ് കോളേജും ചേര്‍ന്നാണ് ഈ അത്യപൂര്‍വ്വ കുരിശിന്റെ വഴിക്ക് ചുക്കാന്‍ പിടിക്കുന്നത്. ‘കലാസ്‌നേഹികള്‍ക്കൊരു തീര്‍ത്ഥാടനം’ എന്നാണ് കുരിശിന്റെ വഴിയുടെ പേര്. ഫെബ്രുവരി 10ന് ആരംഭിച്ച കുരിശിന്റെ വഴി മാര്‍ച്ച് 28 വരെ നീണ്ടുനില്‍ക്കും.

പരമ്പാരഗതകലയും ആധുനികകലയും സമ്മേളിക്കുകയാണ് പുതിയ കുരിശിന്റെ വഴിയിലൂടെ. ക്രിസ്തുവിന്റെ പീഡാനുഭവചരിത്രം പുന:സൃഷ്ടിച്ച് മ്യൂസിയങ്ങളിലൂടെയും രാജ്യത്തെ മറ്റ് പൊതുസ്ഥലങ്ങളിലൂടെയുമെല്ലാം കുരിശിന്റെ വഴി കടന്നുപോകുന്നു. പെയിന്റിംഗുകളും വീഡിയോകളുമെല്ലാം കുരിശിന്റെ വഴിയുടെ ഭാഗമാണ്. വിവിധ മതങ്ങളില്‍പ്പെട്ട കലാകാരന്‍മാരുടെ നേതൃത്വത്തിലാണ് ഇവയ്ക്ക് രൂപം നല്‍കിയത്.

കിങ്‌സ് കോളേജിന്റെ ചാപ്പലില്‍ ഇംഗ്ലണ്ടില്‍ 1981 ല്‍ നടന്ന കലാപത്തെ ആസ്പദമാക്കി ടെഡി ഫെറി എന്ന കലാകാരന്‍ തീര്‍ത്ത പെയിന്റിംഗ് സ്ഥാപിച്ചിരിക്കുന്നിടത്തു നിന്നാണ് കുരിശിന്റെ വഴി ആരംഭിക്കുന്നത്. രണ്ടാം സ്ഥലം ഗാന്ധിപ്രതിമക്കു മുന്നില്‍. മൂന്നാം സ്ഥലം മെത്തേഡിസ്റ്റ് സെന്ട്രല്‍ ഹാളിലും നാലാം സ്ഥലം വെസ്റ്റ് മിന്‍സ്റ്റര്‍ കത്തീഡ്രലിലുമാണ്. തുടര്‍ന്ന് ഇംഗ്ലണ്ടിലെ കാവന്‍ഡിഷ് സ്‌ക്വയര്‍, വാലസ് കളക്ഷന്‍, വെസ്റ്റ് ലണ്ടന്‍ സിനഗോഗ്, നാഷണല്‍ ഗാലറി, ഔര്‍ ലേഡീസ് ചാപ്പല്‍, നോട്രേ ദാം ദേവാലയം, സെന്റ് പോള്‍സ് കത്തീഡ്രല്‍, സാല്‍വേന്‍ ആര്‍മി ആസ്ഥാനം, സെന്റ് പീറ്റേഴ്‌സ് റോയല്‍ ചാപ്പല്‍,വാള്‍ബ്രൂക്ക്, സെന്റ് സ്റ്റീഫന്‍ തുടങ്ങിയ സ്ഥലങ്ങളിലൂടെയെല്ലാം കുരിശിന്റെ വഴി കടന്നുപോകുന്നു.

You must be logged in to post a comment Login