വിശുദ്ധര്‍ പോലും പാപം ചെയ്തവരാണ്: ഫ്രാന്‍സിസ് പാപ്പ

വത്തിക്കാന്‍: വിശുദ്ധര്‍ പോലും പാപത്തില്‍ വീണുപോയിട്ടുണ്ടെന്ന് ഫ്രാന്‍സിസ് പാപ്പ. ഇന്നലെ സാന്റ മാര്‍ത്തയില്‍ അര്‍പ്പിച്ച ദിവ്യബലിക്കിടെയായിരുന്നു ഫ്രാന്‍സിസ് പാപ്പയുടെ പരാമര്‍ശം. ‘എല്ലാ വിശുദ്ധനും ഒരു ഭൂതകാലമുണ്ടാകും. അതുപോലെ എല്ലാ പാപികള്‍ക്കും ഒരു ഭാവിയുമുണ്ടാകും’ മാര്‍പാപ്പ പറഞ്ഞു.

ദാവീദ് രാജാവിന്റെ കഥയാണ് ഫ്രാന്‍സിസ് പാപ്പ ഉദാഹരണമായി പറഞ്ഞത്. ദാവീദ് മാരകപാപങ്ങളൊന്നും ചെയ്തിരുന്നില്ല. ആ ജീവിതത്തില്‍ നിന്നും നമുക്ക് പലതും പഠിക്കാനുണ്ട്. ദാവീദ് പാപിയായിരുന്നു, വിശുദ്ധനുമായിരുന്നു. ഒരു രാജ്യത്തെ മുഴുവന്‍ ഭരിക്കാന്‍ ദൈവത്താല്‍ ഭരമേല്‍പ്പിക്കപ്പെട്ടവനായിരുന്നു അവന്‍, ദൈവജനമായ ഇസ്രായേലിനെ നയിക്കാന്‍ നിയോഗിക്കപ്പെട്ടവന്‍. പക്ഷേ, അവന്‍ പ്രലോഭനത്തില്‍ വീണുപോയി. പാപം ചെയ്തപ്പോള്‍ അവന്റെ ഉള്ളിലെ ആത്മാവ് മരിച്ചു.

താന്‍ ചെയ്ത തെറ്റിന്റെ ഗൗരവം ദാവീദിന് ബോധ്യമായിരുന്നില്ല. ദൈവം നാഥാന്‍ പ്രവാചകനെ അയച്ച് ദാവീദ് ചെയ്ത തെറ്റ് എത്ര വലുതാണെന്ന് അവന് ബോധ്യപ്പെടുത്തിക്കൊടുത്തു. ദാവീദ് പശ്ചാത്തപിച്ചു. ദൈവത്തിനു മുന്നില്‍ മാപ്പിരന്നു. ദൈവം അവന്റെ തെറ്റുകള്‍ പൊറുത്തു.

നമ്മളും ഇങ്ങനെയാണ്. പലപ്പോഴും പാപം ചെയ്യുന്നു, എന്നാല്‍ അന്തിമമായ സത്യം വെളിപ്പെടുത്തിത്തരുന്നത് ദൈവമാണ്. ദൈവത്തിന്റെ ചിന്തകള്‍ നമ്മുടേതു പോലയല്ല. അല്ലെങ്കിലെന്തിനാണ്, ഇസ്രായേലിനെ നയിക്കാന്‍ ബാലനായ ദാവീദിനെ അവിടുന്ന് തിരഞ്ഞെടുത്തത്..? ആരെയും വിശുദ്ധരായി ദൈവം സൃഷ്ടിക്കുന്നില്ല. നമ്മുടെ പ്രവൃത്തികളാണ് നമ്മെ വിശുദ്ധരാക്കി മാറ്റുന്നത്, ഫ്രാന്‍സിസ് പാപ്പ പറഞ്ഞു.

You must be logged in to post a comment Login